ग्रामीण खेडे गावातील मुलगा चक्क केंद्रीय लोकसेवा आयोगाच्या परीक्षेत (UPSC Result) उत्तीर्ण झाला आहे बिरदेव डोणे असे त्यांचे नाव आहे. मुरगूड शिवतीर्थपासून मूळ गावी यमगे (ता. कागल) येथील घरापर्यंत धनगरी ढोल, लेझीम पथक, हलगीचा कडकडाट आणि जेसीबीमधून पुष्पवृष्टी अशा जल्लोषी वातावरणात त्यांची मिरवणूक काढण्यात आली.
या मिरवणुकीत जिल्ह्यासह राज्याच्या विविध भागांतून आलेले त्यांचे मित्र, पाहुणे आणि हजारोंच्या संख्येने स्थानिक नागरिक सहभागी झाले होते. दरम्यान, गावातील प्रमुख मार्गावरून आलेली मिरवणूक बिरदेव डोणे (Birdev Done) यांच्या घराजवळ आली. या ठिकाणी ग्रामस्थांच्या वतीने भव्य मंडप उभारून बिरदेव यांच्या सत्काराचा सोहळा सर्वांना पाहता यावा यासाठी नेटके नियोजन केले होते.
सत्काराला उत्तर देताना बिरदेव म्हणाले, ‘मी साधा आहे, मला साधाच राहू द्या. साधं राहून जगण्यात जी मजा आहे, ती मोठं होऊन जगण्यात नाही. साधेपणातच फार मोठी श्रीमंती आहे. मला कामातून मोठं होऊ द्या…!!,’ अशी भावनिक साद उपस्थितांना घातली. यावेळी प्रचंड टाळ्यांचा कडकडाट झाला.
मुळा एज्युकेशन सोसायटीचे उपाध्यक्ष उदयन गडाख यांनी केंद्रीय लोकसेवा आयोगाच्या परीक्षेत पास झालेले बिरदेव डोंणे यांना पुढील कार्यासाठी शुभेच्छा दिल्या आहेत.
ग्रामीण भागातील मुले यांच्याकडे ज्ञान ग्रहण करण्याची प्रचंड क्षमता आहे.स्पर्धा परीक्षा तुम्हाला स्वतःची ओळख निर्माण करण्याची संधी देते.असे प्रतिपादन यशवंत स्टडी क्लबचे समन्वयक प्रा सचिन शेटे यांनी केले आहे.
